Man City Oo Etihad Stadium Ku Dubatay West Brom Iyo Sky Blues Oo 15 Dhibcood Oo Nadiifa Ah Ku Qabtay Hogaanka Premier League.

Manchesrter City ayaa Etihad Stadium ku dabatay kooxda West Brom waxayna guushani Sky Blues ka caawisay in ay 15 dhibcood oo nadiif ah ku qabto hogaanka Premier League kadib markii ay guuldaro soo gaadhay kooxda kaalinta labaad ku jirta ee Manchester United.

Manchester City ayaa 3-0 ku garaacday West Brom iyada oo Fernandinho, De Bruyne iyo Sergio Aguero ay goolashan kala dhaliyeen waxayna City 25 kulan ka heshay 68 dhibcood iyada oo 15 dhibcood sare uga baxday Manchester United oo 53 dhibcood ugu jirta kaalinta labaad.

Manchester City ayaa guushan ku wadyay kubbad sameeyaha kooxdeeda ee David Silva kaas oo dhaawac looga saaray ciyaarta daqiiqadii 39 aad ee qaybtii hore ee ciyaarta waxaana booskiisa buuxiyay Ilkay Gundogan oo kaydka ka soo baxay.

DAQIIQADII 19 aad ayay ahayd markii ay Manchester City heshay goolka furitaanka kadib markii uu xidiga ree Braxil ee Fernandinho  uu shabaqa West Brom uu ku gaadhay kubbad caawin uu sameeyay xidiga wacdaraha dhigaya ee Kevin De Bruyne waxayna ciyaartu noqotay 1-0 ay City hogaanka ciyaarta ugu qabtay.

Laakiin Manchester City ayaan qaybtii hore wax goolal kale ah u badalin fursadihii ay heshay laakiin waxay ku guulaysatay in ayna Wes Brom siin wax fursad ah oo ay ciyaarta ugu soo laaban karto taas oo ahayd wax aad muhiim ugu ahayd kooxda Guardiola.

Laakiin qaybtii danbe Manchester City ayaa daqiiqadii 68 aad heshay goolka labaad ee ay kalsooni buuxda ku abuuratay iyada oo Kevin De Bruyne uu kooxdiisa u saxiixay goolka labaad kadib markii uu caawin ka helay Raheem Sterling waxayna ciyaartu noqotay 2-0 ay Sky Blues jilbaha ugu laabtay West Brom oo aan awood u yeelan in ay difaacato ama ay goolal la timaado.

Daqiiqadii 89 aad ee dhamaadkii ciyaarta Sergio Aguero ayaa helay goolkiisa ciyaarta kadib markii uu Raheem Sterling sameeyay gool caawintiisii labaad ee kulankan wuxuuna Aguero ku saaciday in uu shabaqa soo taabto iyada oo markan ciyaartu noqotay 3-0 ay City si rasmi ah ugu dishay West Brom.

Ugu danbayn ciyaarta ayaa ku dhamaatay 3-0 ay Manchester City guul raaxo leh kaga gaadhay West Brom waxayna si wayn sare ugu qaatay sidii ay ugu guulaysan lahayd kooxda Premier League iyada oo 25 kii kulan ee ugu horeeyay ka heshay 68 dhibcood waxayna 15 dhicbood ka sare martay Man United oo kaalinta labaad ku jirta.